暴力刑警

標籤: 左冷禪, 法律隨筆

之前新疆武警毆打記者一事，越演越烈，成為大笑話，所以，講物「舉辦奧運」、「中國已經抬頭」芸芸都係得個講字，單單係官員可以隨意向市民施武力，又睜大眼睛說瞎話，就知中國依然係無法治無人權人命，賤過泥嘅落後地方。不過睇番我哋香港，又何嘗唔係「五十步笑百步」，前排咪話有隊警察响無搜查令(search wanant)嘅情況下，衝入新界一間村屋，話入邊有白粉喎，對入邊兩兄弟拳打腳踢，好似仲話打到耳膜都穿埋。

差人一般只有兩個情況下可以唔駛warrant入人間屋﹕(1) 差人响疑犯屋企附近截停佢搜身，有理由懷疑佢屋企藏有白粉，攻擊性武器等，就可以上佢度搜；(2) 又或者响非常緊急情況，如正進行犯罪活動或有人身安全要脅，否則嘅話一個人嘅屋企响法律上等如佢嘅“堡壘”，任何人包括皇帝都唔可以進入，呢個英國响光明革命(Glorious Revolution)之後頒布的Magna Carta中規定嘅國民權益，當中亦包括No custody without trial(未經審訊不可拘禁)，呢D都成為普通法內的部份，所以幾時都話鬼佬响法治上比我哋進步，幾千年，中國人今時今日仲稱呼自己為「老百姓」，而唔係市民或者公民國民，對領導對高官仲有個種逆來順受的奴性。

其實差人嘅古惑招又何止咁呀? 差人帶個犯返差館「調查」，最興帶個犯遊花園，隨便將個犯帶去另外嘅差館，實行玩捉迷藏。响尖沙咀海防道拉咗你，唔一定帶你去老尖差館，帶你去油麻地差館，等你屋企人唔知你去咗邊，揾唔到律師去保釋你，就算揾到律師都無用，因為個律師到咗差館一定要經門口個位Duty Officer(值日官)去聯絡個單案嘅主管，多數係幫辦或者督察，當個OC(Officer in charge)知道有律師嚟咗，就會扮唔係度，叫個Duty Officer用「拖」字訣，唔俾個犯見律師，因為個律師响度，就實聽物都問唔出，因為差館有明文規定，無許可不能隨處亂闖，就算係御用大狀亦無例外，咁就實行律師响下邊呆等，差人係上邊軟硬兼施套料，到個犯物都招哂，先至俾個律師見個客。

又有情況係入屋搜查(對付犯毒或嚴重罪行)一拉就全屋人拉哂，等親友無辦法揾人去營救個疑犯，更加唔好話揾律師。位位扣留48小時，疲勞轟炸一番，得番半條命，博你認番一句半句。

仲有最興半夜三更叫你去做ID parade(認人)，因為半夜三更好難揾夠演員，本來明文話班演員嘅身型一定唔能夠同疑犯有太大差異，但响咁嘅時間，揾夠演員至奇。又或者叫你摸黑去做案件重組，博你瞓唔醒講錯嘢。總之就係層出不窮。唔怪得話生不入官門，死不入地獄。