八卦新聞裏嘅法律知識

標籤: 左冷禪, 法律隨筆

噚日打開份娛樂版乍見半紅不黑的Solar兄弟被索償二千幾萬毁約賠償，今趟，佢兩兄弟真係賣身都唔掂，不過唔知有邊方高人教路，佢哋識反駁受外界不當影響(undue influence)而簽咗份約。結果係點無人知，不過差不多一年前三色台有位樣子俊朗的小生，鹹魚翻生後被佢過氣兼外號「樂壇吸血鬼」的師父索償，搞到有一排成個靚樣down哂，見到都心痛。

事緣咸豐年前靚仔小生被吸血鬼昆咗簽份賣身契，話以後都要將佢每年一半收入去孝敬吸血鬼。後來靚仔小生人氣下滑，唯利是圖嘅吸血鬼就將佢賣斷去寶島，過住有家歸不得的放逐生活。前兩年靚仔獲三色台女高層垂青，人氣即時V型反彈，吸血鬼就飛撲出嚟揸住張賣身契叫靚仔鎊水，諗住撈點油水。

呢單嘢有幾個頂癮合約法的觀點：(一)普通法話要構成有效合約要有4個元素，即offer, acceptance,consideration(代價)及 intention to make legal relation。吸血鬼叫靚仔簽賣身契要將未來每年一半的收入俾佢，吸血鬼自己攞盡着數，但靚仔就無條件咁送錢俾佢，講衰D就係蝕哂大底，但consideration據我理解係互惠互利，各取所需，而在缺乏consideration的情況下，呢份賣身契就無效(void)兼無約束力(not binding)；(二)呢份完全益哂吸血鬼嘅合約，佢作為靚仔小生的師父，應該俾靚仔响畫隻龜之前諮詢獨立意見。法律上有兩種undue influence，一叫actual undue influence，即係你揾張刀「行」住人條頸，咁就算叫對方俾晒副身家你，人哋梗係要揸頸就命；另一隻叫presumed undue influence，即係就算你無「凶」人，但由於你兩條友關係親密，法律上已假定你有向對方使用不當影响，呢種假設關係包括夫婦，醫生與病人，律師與客戶等，總之係一方會信賴另一方的情形。

所以係响樓宇按揭的情況下，如果夫婦要抵押共同擁有物業作配偶周轉之用時，銀行必會要求另一方揾獨立法律意見，以免最後因為發現有不當影響後，void咗份借貸合約，好似次按咁血本無歸。另外要打undue influence，仲要證明份合約會導致一方遭受巨大不利(manifest disadvantage)，有單鬼佬案叫Goldworthy v Brickell [1987] Ch.378條番鬼官Nourse L.J.話﹕

…the presumption is not perfected and remains inoperative until the party who has ceded the trust and confidence makes a gift so large, or enters a transaction so improvident, as not to be reasonably accounted for on the ground of friendship, relationship, charity or other ordinary motives on which men act.

講真D，就係稍為有腦嘅正常人都唔會做D咁白痴兼戇居嘅承諾或交易。聽講簽份賣身契時，靚仔信哂吸血鬼，對佢當成恩師咁，聽哂佢話，咁嘅勢吸血鬼就深受靚仔信賴，點會估到佢咁仆街俾塊西瓜皮佢踩。再加上直到死為止都要攞一半收入去養呢條貪得無厭爛賭到唔恨的吸血鬼，真係同俾咁半條命佢無分別，如果咁都唔叫manifest disadvantage，咁就真係殺咗人都唔使填命囉；(三)最後一點就係打民事索償要講時限，一般毀約索償期限為六年，淨係靚仔响寶島過非人生活就已差唔多有六年。咁多年都唔去追人，過咁耐先掘番份陳年老約出嚟，吸血鬼你收擋啦，你嘅追索權同你個人一樣，過晒氣。

吸血鬼查實運氣衰到貼地，幾個月前我有個同事响澳門永利撞見佢賭錢，個衰樣就霉過梅菜，買邊瓣就輸邊瓣，咁無運行，如果真係癲到去告有三色公仔箱撐腰嘅靚仔就聽輸堂費破產，瓜咗都無錢俾殮葬費。