蘋論?

標籤: 明日黃花, hystericireul

選舉日誌：煲呔舊橋拆政治炸彈 誰人搞掂小小超

我以下講既唔係乜野評論文章，純粹係少少個人觀感，都係用口語會好少少。

有民主派中人承認，煲呔用的是「舊橋」，「但係橋唔怕舊，至緊要受。」若事件由立法會調查，立會以政治角度了解院風波，「唔理證供有冇疑點，被告一定食晒，但由胡法官做調查，除非證供毫無疑點，否則要胡官信納，根本好難。」這樣調查，可以查到甚麼結果？再加上主席胡國興是政府最信賴的人，政府最難纏的「敵人」公民黨有一個「死穴」，就是從不罵法官，以免破壞司法獨立，煲呔如此處處「算到盡」，最終查到甚麼？政圈中人，心知肚明。

咁即係點？我只覺得佢暗示左搵個法官黎查一定唔會查到ｄ乜，字裡行間好似講到應該搵民主派黎查，應該查到有事先至為之合理咁。司法程序，普通法既精神係疑點利益歸於被告，「證供毫無疑點」係一個好基本既要求，否則你成立「委員會」既目的只係為左誅死個官（唔理佢有冇罪）咁邊有公信力？邊有理性可言？

「唔理證供有冇疑點，被告一定食晒」就係因為咁，所以萬唔可以畀立法會去查呢件事，你究竟係想查清楚件事定係想見到有人唔清唔楚就落臺？

「這樣調查，可以查到甚麼結果？」點解搵法官查就會查唔出野，搵民主黨查就會查到出野？我地係想見到「查出野」定係想要個真相？李國章做到天怒人怨係一件事，佢有冇做過妨害學術甚至言論自由係另一件事。呢篇文章係咪想話最好由民主派黎開委員會，唔理三七二十一李國章一定有罪，咁就為之好？

曾蔭權唔係「算到盡」，根本件事就好簡單，亦都好嚴肅，呢次係關乎言論自由既事，如果查出李國章真係有做過，十個李國章都要下台加另外懲處。但係正因為件事咁嚴重，更加需要小心ｄ去查，確保客觀公平，將件事政治化只會令成件事變左派系鬥爭，有乜野好處？咁樣就算可以令搞教育搞到一鑊粥咁既李國章落臺又點？言論自由、學術自由呢個根本問題都無處理過。所以以法律精神去處理根本好合理，唔關橋唔橋事。

原來除左太陽報果班盲毛，蘋果都唔少呢種唔知係乜既邏輯既所謂評論。