政治兩頭蛇－－評副局長、政治助理國籍事件

標籤: 左冷禪, 法律隨筆

(憲法唔係我嘅專長，有乜錯漏多多包涵)

兩日前閒來無事做，開部電腦瀏覽一下圖書館網頁，赫然發現區區一個圖書館主任仔都要中英國語流利，要修讀過相關證書課程，又要有六、七年圖書館理經驗，嘩! 但係人工少得可憐，得萬三蚊，响咁嘅通漲年代，真係唔知夠買油定夠買醋。呢種正式係嗟來之食!

相反近日搞到滿城風雨嘅副局長政治助理，就動不動都十幾廿皮一個月，但係有咩學歷工作經驗就鬼知，除咗有一個係律師行合顆人同一個係大狀之外，其他係乜水，搞笑到連响老鼠園做管理都可以一人得道，雞犬升天，呢班福祿壽仲PK到玩雙重國籍，拿住本鬼佬護照响外國鹹豆都無粒食就學人耍回馬槍食回頭草都算，仲衰到想做官嚟管治我哋，仆街啦!

講到尾，有外國國籍嘅中國人可唔可以做高官? 根據基本法第44，55，67條行政長官，行政會議同立法會議員都唔可以係foreign passport holder，而第61條更講明特區“主要官員”都唔可以有外國護照，第101條更列明某些官員一定唔可以係假洋鬼子，道理一字咁淺，第一按照基本法的立法原意/序言(premable)，是意味着中華人民共和國响香港行使主權，實施港人自治(佢係咁寫啦)，如果揸本外國護照，唱咗鬼佬國歌，宣埋誓嘅都可以管治香港，咁不如揾番肥彭做特首，起碼我相信英國佬嘅政治智慧會高過你班壽頭多多聲；第二，上邊提及嘅職位會經常接觸，管有，閱讀同埋知道大量涉及香港政府嘅高度機密，包括防護保安，金融財經嘅資料，呢D係一級機密，好似長實嘅highly confidential 文件，會唔會比新地嘅人睇？唔好講埋哂d邏輯哲學呢d唔等駛嘅野，現實社會就係咁，同行如敵國，你又幾時見過美國國防部，中情局或者聯儲局嘅副首或者佢哋班助理會有外國護照? 第三，所有首長甚至同級公務員就職個陣都會宣誓效忠中華人民共和國香港特別行政區同基本法，咁如果有條友坐完移民監，唱完國歌宣誓效忠美利堅合眾國，依家又走嚟話效忠香港同基本法，咁即係朝秦暮楚，同五代十國時候果條死老嘢馮道又有物七分別呢? 呢種人有奶便是娘，換轉係1942年嘅香港，見到皇軍肯定鞠恭兼“打巴高多坐多坐”咁salute。咁佢究竟係效忠美國定香港? 有起事嚟佢會照顧邊一方嘅利益?

上邊提到嘅基本法第44,55,61同67條講明只有“無外國國籍嘅中國公民”嘅先有資格做高官，而何謂中國公民? 首先基本法附件三入邊列明中華人民共和國國籍法响香港係法律一部份，按照國籍法第三條表叔係唔承認雙重國籍，第九條更有意無意針對班鍾意認鬼佬做君主嘅中國人，講明定居外國而入咗籍嘅，就自動喪失中國國籍。咁呢班壽頭即係唔再係中國公民，如果咁都仲可以做副局長，即係違憲(unconstitutional)，任何睇唔過眼嘅滋事份子都可以illegality為理由申請司法覆核。咁你又會問嗰批騎呢畸胎政治助理又受唔受限制? 你要知呢隻怪胎都係最近先有，咁1990年己經頒布嘅基本法又點會foresee得到？所以第101條列出個list，一定唔會係exhaustive，基本法係全國性憲制文件，唔係憲法－－constitutional document唔等於constitution－－去解釋佢就唔可以淨係睇條文，按照statutory interpretation(法定釋義)中ejusdem generis(同類)解釋，只要係屬於“高官”個類，都會受此約制，政府成日鍾意無啦啦生達罅，話唔定遲D安個性愛局，去監管港人嘅做愛次數同花式，咁性愛局局長或司長一職雖然不在第101條之列，但出任此職之人都唔可以係兩頭蛇。“高官”同一般嘅公務員甚至AO、EO最大分別之外，在於後者只係技術性官僚，只負責執行政策，而前者就係決策或者參予制訂政策發號司令，政治助理雖然唔係司長局長級，但首先佢哋嘅人工絕對有首長第四五級嘅level，再者佢班懵丙日常嘅工作就係幫班局長scan過叠機密文件然後出謀獻策，咁一定會睇埋唔少關乎香港政府嘅機密文件－－其中有件仲係有新加坡護照。係人都知，坡佬一直當香港係假想敵，呢條撚樣會唔會走去通敵向自己「祖國」放料都唔使多講－－佢哋睇嘅資料同行政會議、立法會議員睇嘅一定無物差別，分分鐘仲堅過佢哋，咁既然班議員唔可以有外國居留權，點解呢班阿福就可以有?

至於另外有居英權個件蛋散，據朋友說，陶傑條盲毛曾經話居英權唔等同外國國籍，因為佢未行使，聽到D咁嘅謬論真係笑爆咀。根據British Nationality (Hong Kong) (Selection Scheme) Order 1990 SI 1990/14，呢班有居英權嘅人同英國人係法理上完全無分別，响British Nationality (Hong Kong)Act 1997話明："the Secretary of State shall on application register as a British citizen any person who was ordinarily resident in Hong Kong and satisfied certain conditions immediately before 4 February 1997"。而British Nationality (Hong Kong)Act 1990 己經清楚寫明the Home Secretary could confer citizenship on up to 50000 Hong Kong residents...to enable them to live in the United Kingdom。請問如果有條友被英國內政大臣confer咗citizenship，仲register埋，咁唔係擁有外國國籍係咩?　Citizenship同nationality被人話前者係屬地區性(municipal)，後者屬國際性，但根據英國University of Dundee Robin M White响"Permanent Resident of the HKSAR as quasi-nationality"講their distinction is unnecessary。再者，英國係無nationals 同 citizens 的稱謂，一律叫 British subjects。所以呢條有居英權嘅忍樣同奧雲仔响法律上係無唔同，都係British subjects。真係唔該阿陶傑唔好亂尻咁講嘢，咪真係以為自己物都識，真係才子至得架。係香港除咗己經退咗休嘅Professor Yash Ghai同陳弘毅教授有資格係傳媒評論國籍法之外，其他人都行埋一邊，唔好舢板充炮艇。