狀門兩條柴

標籤: ,

細讀Harry Potter後,方知原來J.K. Rowling稱呼魔法世界內唔識施法的巫婆巫師為Squib*。這個字非常好用,我亦愛借此譏諷那些得個死人樣着套老西,打哂領帶,甚至學人揸個死死重重公事包既律師,查實佢哋舢板充炮艇,除咗得個牌外,根本就無半點法律知識,可謂法律界嘅squib。唔識嘢既市民揾着佢哋,真係命都唔長。

有位叫FK的律師執業多年,喺九龍開咗間firm,仲學人收埋徒弟,但佢擺明就係squib,有趟個客上門揾佢幫手收樓,佢拍心口話包掂,學人寫了封洋洋數百字的律師信去凶個租客。內容大概是按新實施的「業主及租客條例」,業主只需給予租客一個月通知,便可中斷租約。但FK這趟就PK啦,因為有關的租約係喺新例實施前已簽訂,唉,就算係上水養豬既阿嬸都知法例係無追溯力(retrospectivity),咁即係話要踢走個租客還要引用舊例section117(E)內的理據,還要跟足步驟,serve啲咩CR101俾個tenant,然後等對方用CR103回覆,總之一句到尾,手續煩到震。但差點笑甩我隻大牙,仲係對方是非一般租客,條友喺土地審裁處做咗十幾年,以上啲法例熟到俾人用塊磚扑穿個頭都講得出,當堂就寫番封信俾FK,大番佢轉頭。

收樓收唔成,最氣結的就梗係個landlord,佢當然向FK大興問罪之師,不過FK比起陳水扁條打靶友都算有點羞愧心,聽到個客殺到,即龜縮喺間房度,扮唔係office,叫個trainee頂住先,真係十足十當年英法聯軍打到去大沽口,咸豐走去熱河避暑山莊,叫恭親王頂住班鬼佬一樣。不過,好似FK呢種狀棍,香港大把,比佢老哥更不濟的,亦大有人在,不過佢呢單嘢係比較好笑,所以先同大家分享。

另外仲有個L大狀,扮野扮到出神入化,我仲記得讀PCLL嗰陣,佢話個同學好上堂玩轉筆,話影響律師專業形象,其實佢條契弟喺Court的表現先至辱及狀門,影響專業形象。

話說有次佢戴頂假髮學人上高院,幫個客告PI(Personal Injury)。按香港既Rule of High Court Order18,律師喺庭上的陳述一定要跟足Pleadings,即係狀紙/起訴書/誓章話A,庭上就唔可以講B。佢個客在尖東九鐵店高空工作不慎跌咗落地傷咗,喺Pleadings佢話人由堂木梯跌落黎,但陳詞嗰陣又話人喺架空燈跌落黎,牛頭唔搭馬咀,累到個客輸咗單case,一毫子都無得賠。單野仲當反面教材咁刊登喺Hong Kong Cases(一套本地具權威性的案例書),真係羞家到痺。所以計我話,律師如果無料到,就真係扮物七都無九用。狀門廢柴多,下回再講過。

* A Squib is someone who was born into a wizarding family but hasn’t got any powers.

1 留言:

kemuiyone 說...

I like reading your story!!!

write more about the unknowns in the legal profession la...

support support.