斷正

標籤: 考試教育, 明日黃花, 魚雷

小息。
「陳芷玲，maths，快！」
「Prefect 喺度呀仆街！」

「走咗喇，快啦，一陣就 maths 堂！」
「嗱。」

「喂你做緊乜？」
「sor 呀張 sir，尋晚唔記得做，而家仲做緊。」
「你當我盲？收埋本簿我就睇唔到喇咩？攞出嚟啦。」
「陳芷玲你做乜借佢抄？」
「無呀，我擺喺枱面諗住一陣交，小息完咗返嚟已經揾唔到。」
「係呀，係我自己攞咋。」
「今個月第三次，呢個學期第七次喇喎黃同學，我好難唔記你缺點。」
「哦。」


Lunch。
「做咩吸煙？」
「讀書壓力大囉，A level 辛苦嘛張 sir。」
「咁大個人都唔知吸煙唔啱？」
「喂我過咗十八歲喇喎，法律上我可以食煙，你憑咩講啱唔啱先？」
「仲唔認錯？吸煙已經記一個小過，唔認可以記多你一個。」
「校規唔俾我食，而家斷正，我又無唔服又無唔認。你一年捉幾百單抄功課，個個都話自己攞人哋份功課，九成九講大話啦，又唔見你記多佢哋一個缺點。」
「好聲好氣同你講，你仲要咁講嘢？」
「阿 sir 你冷靜啲，我一早認咗，唔信你問捉我個 prefect。」

「見你第一次，而家記你一個小過。」
「哦。」
「咪話陳 sir 唔幫你，唔係就記你兩個小過。」
「多謝阿 sir，其實一個定兩個都無咩分別。」
「咁我叫張 sir 改返囉。」
「唔使喇，唔好勞煩佢啦。」
「總之以後食還食，唔好喺學校食啦。大個喇你，顧吓自己身體啦，唔好食太多。」
「知道喇。」


放學。
「詠佩，你知發生咩事啦？篇嘢係咪你寫？」
「係。」
「你知唔知而家搞到好大件事，我哋幾個老師、副校長為咗你要開幾耐會？」
「對唔住呀 miss，我真係無諗過會咁，嗰陣我已經即刻講咗對唔住喇。」
「唔好講咁多喇，而家記你一個大過，當係個教訓啦。」


（本故事純屬虛構，如有雷同，實屬巧合。）

延伸閱讀：
網誌幸災樂禍　女生被記大過
來函鄺恩瀚：從記大過看社會價值觀

附筆：指責「網民」「愈來愈容不下非主流的聲音」，其實我們的社會、教育制度何曾容得下？反而在網絡上才讓非主流的聲音有機會發表，問題的根柢在於我們的 社會風氣、學習環境如何對待其他意見不同的人。而且，視「網民」為一個整體，只着眼於起底組的工作而忽略反對起底的聲音，然後視網民為暴民、民粹主 義，這類針對網絡生態的評論已經太多了，多得近乎陳腔濫調。