大狀鐵腳組合

標籤: ,

有人成日批評特首選舉係小圈子選舉,缺乏公開,但其實申請做QC/SC(御用/資深大律師)又何嘗唔係小圈子?幾丁大法官大律師開閉門會議就決定人地做唔做到SC,任期五年的特首你班友仔都吱吱咗咗,終身制的資深大律師又唔見你出聲?細佬見識少,自問只係七八流腳色,絕對唔敢批評班狀門一哥一姐。不過做SC都要講吓同班法官老唔老友,好講關係,你有料唔一定做到,理由係你同人地唔係老死。

有位阿武哥,係狀門都頗資深,外型一點都唔討好,仙風道骨,我估佢都只係重過己故慈善伶王新馬師曾幾磅,層皮包住棚骨,八號風球行出街實聽吹走,我同佢起咗個朵叫「排骨Bar」(Bar即Barrister大狀)。但正如武俠小說一樣,奇貌不揚騎騎呢呢果班多數係高手,有邊個會估到《鹿鼎記》位盲眼肺癆老太監海大富會咁好打?又有邊個會猜到《天龍八部》中最好打唔係北喬峯南慕容,而係少林寺看守藏經閣果位灰袍老僧?所以以此推論,全香港法律知識最豐富極有可能係港大法律圖書館執書位阿嬸,或者喺終審法院幫李國能間房吸塵倒垃圾位阿姐。

「排骨Bar」阿武哥絕對係高手,佢英文非常好唔在講,法律知識滾瓜爛熟,打開本Law Report,報導佢打親都羸,對住SC都多數實食無走雞,不過佢衰在個樣唔得,原來行家比我仲刻薄,背後叫佢做「老鼠」(即刻諗起《絕代雙嬌》內十二星相之首魏無牙都係老鼠),再加上據聞武哥响庭上連大老爺都照寸,仲係窒到應棍果隻,所以呢世都唔駛旨意有得升,所以你咪話呢行唔黑暗。反而有位篤信風水愛著紅襪(好在唔係紅鞋)的名狀就好耐之前已著咗件絲袍(SC穿絲質袍上庭,所以進身QC/SC,番話又叫做take silk),但係打親官司多數都敗北。近日响公仔箱出現果件阿倫雖然都係silk,鏡頭前佢好似好嘴刁,但响法庭多數都表現得叫人失望。不過好難怪,正如王家衛部《東邪西毒》裏邊哥哥飾演的歐陽鋒講過﹕「識武功,好多嘢都唔做得,你無理由走去耕田,更加唔會去打獵。」現實生活中做SC好多嘢都唔做得,你無理由出埋D邋遢招,更加唔可以收埋D對自己不利的證據(查實就算唔係SC都唔得)。有次聽上訴庭楊振權大法官講佢過馬路即使無車連紅燈都唔過得,咁你話做人仲有乜趣味?

所以响呢個好重視人事關係的行業中,做到SC唔一定係堅嘢。不過有一位狀王真叫我肅然起敬,係少數真材實料之流,姑且暫叫佢老馮。法律呢門學問拍得上醫學,當中有好多科,大分可分為民事、刑事,但如要分得精確點,民事中又有憲法及行政法、合約法、公司法、衡平法(Law of Equity)、普通法(Common Law)、民事侵權法(Law of Tort)、土地法、稅務法、知識產權法、海事法、證券法(Law of Securities)、銀行法等起碼二十多項,單要精一兩瓣己經係好嘢,更何況老馮好似瓣瓣都惦,見佢又打刑事,又打司法覆核,又打商業訴訟,連中國傳統法都玩埋,而且重係羸多輸少個隻。回歸初,有人挑戰基本法的憲制有效性,老馮幫政府上庭,人地三個大狀(其中一件都係SC)圍毆佢一個,老馮都頂得順,收拾咗呢三個搞屎棍,老馮好嘢。個人有打官司心水,揾老馮做胆,拖排骨Bar,咁嘅夢幻組合,遇佛殺佛,仲有乜官司唔掂!!

3 留言:

道士 說...

「有人成日批評特首選舉係小圈子選舉,缺乏公開,但其實申請做QC/SC(御用/資深大律師)又何嘗唔係小圈子?」
所以嘛! 我一向不支持普選﹐唔係樣樣多人話係就真係係! 無錯﹐普選在自由的出發點﹐最終可能是件好事﹐不過不是現今的香港。

雖然話香港不缺乏知識層﹐不過怎才算有知識﹐係唔係教下中學﹑小學﹐就叫有學識? 唔係文盲就可理智評論政事? 在香港﹐有知識嘅人又會唔會多得過無知識嘅人先?

看著大班﹑長毛這類人也進入立法局﹐想想有普選都教人心寒﹐唔通要搞到像台灣﹐銀紙下出政權﹐入到去又拳頭議事先叫還政於民? 看看美國選出天下一大混蛋﹐我們還要向著那個目標進發? (要有民主鬥士就註定要搞事坐街﹐當收市民六十萬一年﹐搞事也不是﹐不搞事也不是﹐長毛那份矛盾兩難的身份﹐尷尬而好笑。好啦!話政府唔得﹐比埋你做啦﹐做得出乜?世界咁黑暗﹐唔通要比埋個皇帝佢做先叫自由?)

世界上根本就無個原全無問題嘅制度﹐choice between two evil, 我們可選的是無咁衰那個﹐現在扮扮民主幾好呀! 而且一開始只訂立五十年不變﹐市民在以為有著數的大前題下﹐給這群想得權嘅人煽動得大叫:「我要自由!」嘅同時﹐有無想過更長遠的社會道路? 會唔會有要兩政走向一統那天的出現? 任何人當政﹐也不可能變出銀紙﹐和中國嘅關係搞得不好﹐今日得的可能他日嘔突。看看東西德﹑蘇聯﹐變得過急的政體是不會出現什麼好結果的。

「全香港法律知識最豐富極有可能係港大法律圖書館執書位阿嬸,或者喺終審法院幫李國能間房吸塵倒垃圾位阿姐。」
工作崗位﹑個人興趣﹑學識深入程度﹑待人處世﹑成就高低﹐本來皆風馬牛各不相干之事﹐不過世界有幾多個good will hunting 就很值得質疑。行過世界的大學校園﹐總有一兩個埋頭書本﹐好像失心瘋的教授在隨處遊蕩﹐可能武功深不可測﹐不過又有乜用? 很多時﹐天才和白痴真只差一線。不過又比回說歐陽鋒﹐就算後來其實武功天下第一都不能自知﹐挑戰著是自己的影子﹐再想下去﹐"我是誰? 我在做什麼?"﹐總有種人生在世就是無奈的心酸。

「所以呢世都唔駛旨意有得升,所以你咪話呢行唔黑暗。」
不只為官者﹐每個行業也自有其黑暗之處﹐因為人心有其黑暗處﹐不能扶搖直上﹐在某些人來說可能可惜﹐不過可能當事人追求的又不是那回事﹐一個人總不能什麼也得到。

魚雷 說...

「再想下去﹐"我是誰? 我在做什麼?"」
結果,可能會變成徐步高

匿名 說...

左兄,
請問呢個大狀鐵腳組合打刑事OSCO s25掂唔掂呢?有冇更好既推介呢?如不方便公開作答,可否電郵告知?謝謝!
manlost11@gmail.com